Տէրը խօսք մը կը խօսի Ես 61.1–4-ին մէջ, զոր Տէր Յիսուս Նազարէթի ժողովարանին մէջ խօսած ատեն կը մէջբերէ՝ Իր Անձին վերագրելով զանիկա (Ղկ 4.16–21):
Այս համարին յետին միտքը Յոբելեան տարին է, որ նկարագրուած է Ղւ 25.7-ին մէջ:
- Եօթը տարի անգամ մը, Հրեաները «Շաբաթ»ի օրինակով իրենց հողին հանգիստ կու տային:
- Եօթը եօթնեակէն, այսինքն՝ քառասուն իննը տարի ետք, յիսուներորդ տարին կը տօնէին իբրեւ «Յոբելեան» տարի:
- Այդ տարուան ընթացքի բոլոր պարտքերը կը ներուէին. հողերը ետ կը վերադարձուէին իրենց տէրերուն:
- Գերիները ազատ կ'արձակուէին:
- Իւրաքանչիւր անձ նոր սկիզբ մը կը ստանար:
Երբ կը հաւատանք եւ կ'ընդունինք Յիսուսը, Անով կ'ապրինք մեր հոգեւոր «Յոբելեան» տարին:
- Կ'ազատագրուինք կապանքներէ:
- Մեր հոգեւոր պարտքերը վճարուած կ'ըլլան:
- Կ'ապրինք Տիրոջ հաճելի տարուայ ժամանակին մէջ:
- Սուգի մոխիրին փոխարէն, Ան մեր գլխուն դրաւ փառքի թագը, որովհետեւ Ան մեզ թագաւորներ ըրաւ, ըստ Յյտ 1.6-ին:
- Մենք Անոր Հոգիով եղանք օծեալներ եւ հագանք արդարութեան պատմուճան (Ա.Յհ 2.20: Ես 61.3,10):
Իսրայէլի որդիները՝ թէեւ տերեւները թառամած բեւեկնիի եւ ջուր չունեցող պարտէզի պէս էին (Ես 1.30), սակայն Թագաւորութեան մէջ եղան.
- Ջրարբի պարտէզի պէս (Ես 58.11)
- Եւ արդարութեան բեւեկնիներ (Ես 61.3)
- Բոլոր հաւատացեալները կանչուած են ջուրի ճամբաները տնկուած ծառի պէս ըլլալու (Սղ 1.1-3), Տիրոջ փառքին համար (Ես 61.3):
Մեզի ուղղուած Իր այս տարուան պատգամին միջոցաւ, Տէրը իմ եւ Կեանքի Աղբիւր եկեղեցիին վրայ հռչակեց «Յոբելեան» տարին:
- Սուրբ Հոգիով նորոգելու (Սղ 104.30)
- Հոգեւոր եւ նիւթական աղքատութեան փոխարէն, յաջողութեան աւետիսը տալու (1)
- Ներքին եւ արտաքին վէրքերու բժշկութիւն ստանալու
- Մոլութիւններէն ազատելու
- Կապանքներէն ազատելու
- Քեզ մխիթարելու եւ սուգդ ուրախութեամբ փոխելու (2)
- Սուգի մոխիրին փոխարէն փառքի պսակը հագցնելու (3)
- Սուգի փոխարէն ուրախութիւն տալու
- Կոտրած եւ վիրաւորուած հոգիի փոխարէն, գովութեան եւ արդարութեան պատմուճան հագցնելու
- Հին աւերակները շինելու (4)
- Կործանուած բաները վերականգնելու
- Դարերէ ի վեր ժառանգուած աւերակները նորոգելու
Թէեւ թառամած բեւեկնիի եւ չորցած պարտէզի պէս ըլլաս, բայց այս տարի կանչուած ես ըլլալու.
- Ջրարբի պարտէզի պէս
- Եւ արդարութեան բեւեկնիի պէս